आमगाव : तालुक्यातील बनगाव येथील रिक्त झालेल्या प्रभाग ३ मधील जागेसाठी २४ ऑगस्टला मतदान झाले. २६ ऑगस्टला मतगणना झाली. यात भाजपचे दिनदयाल थेर यांनी राष्ट्रवादीची कायम असलेली जागेवर विजय संपादन केले.
बनगाव ग्रामपंचायतच्या प्रभाग तीन मधील राष्ट्रवादीकडे असलेली जागा रिक्त झाल्याने या जागेकरिता पोटनिवडणुक घेण्यात आली. निवडणूक कार्यक्रम जाहीर होताच राष्ट्रवादी नेत्यांनी सदर जागा स्वत:कडे कायम असावी यासाठी मुकेश ग्यानीराम शिवणकर यांना उमेदवारी देण्यात आली होती. तर उमेदवार जिंकण्यासाठी जि.प. सदस्य सुखराम फुंडे, राष्ट्रवादीचे नेते नरेश माहेश्‍वरी, विजय शिवणकर यांनी धुरा सांभाळली होती. भाजप उमेदवार दिनदयाल सुखराम थेर यांच्या प्रचारात तुलसीदास भुजाडे, मोनज सोमवंशीे, सुषमा भुजाडे, बाळा ठाकूर, काशिराम हुकरे या तरुण कार्यकर्त्यांनी सदर निवडणूक प्रतिष्ठेची केली होती.
सदर निवडणुकीत एकूण ६४३ मतदान झाले होते. यात दिनदयाल थेर यांना ३४५ मते तर मुकेश शिवणकर यांना २९३ मत मिळाली. ५ मते नोटाला मिळाली. थेर यांनी ५२ मतांनी निवडणूक जिंकली.
निवडणुक निकाल लागताच भाजप कार्यकर्त्यांनी गुलाल उधळून विजयी मिरणवणुक काठली. यात भाजप कार्यकर्त्यांनी जल्लोष केला.

चंद्रपूर दि.27: टफ युनिव्हर्सिटी युएस, युनिसेफ व निरी नागपूरची चमू चंद्रपूर जिल्ह्याच्या दौर्‍यावर आली आहे. ही चमू पाणी पुरवठा योजना नसलेल्या व पाणी पुरवठा योजना असलेल्या अशा चार तालुक्यांतील १0 गावांमधील पाणी नमुने तपासणी करीत आहे. पाणी नमुन्यांमध्ये आढळलेले दोष दूर करण्यासाठी ही चमू शासनाला अहवाल सादर करणार आहे.
टफ युनिर्व्हसीटी युएस व युनीसेफच्या गॅब्रेला स्टींग, निरी नागपूरचे वरिष्ठ शास्त्रज्ञ डॉ. खडसे, सहाय्यक म्हणून सतीश सावळे यांचा या चमूत समावेश आहे. ही चमू दहा दिवस चंद्रपूर जिल्ह्यातील चार तालुक्यांमधील विविध गावांना भेटी देणार आहे. शासनस्तरावरुन चार तालुक्यातील दहा गावांचा समावेश करण्यात आला आहे. यामध्ये ज्या गावांमध्ये पाणी पुरवठा योजना आहे व ज्या गावांमध्ये पाणी पुरवठा योजना नाही, असे गावे निवड करण्यात आलेली आहेत.
या दौर्‍यामध्ये ही चमू प्रत्येक गावात जाऊन प्रथम ग्रामपंचायत मध्ये सर्व ग्रामपंचायत सदस्य, पाणी पुरवठा समिती अध्यक्ष-सचीव व सदस्य , जलसुरक्षक, आशावर्कर तसेच गावकरी यांच्यासोबत चर्चा करुन पाणी वापर कसे करतात, याबाबत विस्तृत माहिती जाणून घेत आहे. त्यानंतर ते गावांमध्ये काही महिलांसोबत चर्चा करून तेथील पाणी नमुने तपासणी केली जात आहे.

गोंदिया,(berartimes.com)दि.26- मातीपासून लाल वीटा उत्पादन करणार्या व्यवसायावर शासनाने प्रतिबंध लावून फ्लायअ‍ॅश पासून बनविण्यात येणार्या विटाचा वापर बंधनकारक केले आहे.एकंदरीत हा निर्णय म्हणजेच कुंभार व्यवसाय नष्ट करण्याचा शासनाचा कुटील डाव आहे.असा आरोप महाराष्ट्र कुंभार समाज महासंघाने केला आहे.तसे निवेदन निवासी उपजिल्हाधिकारी प्रविण महिरे यांच्यामार्फेत राज्याचे मुख्यमंत्री देवेंद्र फडणवीस यांना आज २६ ऑगस्ट रोजी शिष्टमंडळाने पाठविले आहे.
केन्द्रीय पर्यावरण व वन मंत्रालयाच्या ३ नोव्हेंबर १९९९ च्या अधिसूचनेनुसार महाराष्ट्र शासनाने भूपृष्ठावरील उपजावू मातीपासून लाल वीटा तयार करणार्या उत्पादकांना प्रतिबंध करण्यात आला असून कोळसा किंवा लिग्नाईटवर चालणार्या औष्णिक विद्युत केन्द्रापासून ३०० कि.मी.च्या त्रिज्येच्या क्षेत्रात बांधकामात फ्लायअ‍ॅशपासून बनविण्यात येणार्मा वीटाचा वापर करणे बंधनकारक केले आहे.यामुळे संपूर्ण कुंभार समाजावर उपासमारीची वेळ आली आहे. समाजाच्या छोटेखानी वीटभट्ट्या बंद पाडून कुंभार व्यवसाय बंद करण्याचा कुटील डाव शासनाने रद्द करावा.अन्यथा महाराष्ट्र कुंभार समाज महासंघ शासनाविरूद्ध तिव्र आंदोलन करेल असा इशारा निवेदनातून देण्यात आला आहे.निवेदन देतांना महासंघाचे राज्य संघटक गोविंद वरवाडे,शंकर मोहरीया,युवा जिल्हाध्यक्ष हितेश चक्रवर्ती,सुनील प्रजापती,कैलाश प्रजापती,रामनाथ प्रजापती,संजय आमदे,रामगोपाल प्रजापती,राजेद्र प्रजापती,महेश प्रजापती,कैलाश प्रजापती,प्यारेलाल प्रजापती,विनोद प्रजापती,सुनिल प्रजापती,रवि प्रजापती,संजय प्रजापती,सुरेश प्रजापती,भोलेश्वर चक्रवर्ती,प्रेमकुमार चक्रवर्ती,ईश्वर चक्रवर्ती,राजेश पाठक,ओबीसी संघर्ष कृती समितीचे सयोजक खेमेंद्र कटरे आदींनी शिष्टमंळाचे नेतृत्व केले.शासनाने त्वरीत निर्णङ्म मागे न घेतल्यास तिव्र आंदोलन करू असा इशारा देण्यात आला आहे.

गोंदिया,दि.२६ : शासनाच्या अनेक लोककल्याणकारी योजना आहेत. या योजनांचा लाभ घेता यावा यासाठी गोंदिया-भंडारा जिल्ह्यात वास्तव्यास असलेल्या मांग गारुडी, बहुरुपी, नाथजोगी व भिंगी या भटक्या समाजातील नागरिकांचे प्रश्न संबंधित जिल्हा प्रशासनाने तातडीने सोडवावे, असे निर्देश सामाजिक न्याय मंत्री तथा जिल्ह्याचे पालकमंत्री राजकुमार बडोले यांनी दिले.
२४ ऑगस्ट रोजी नवेगावबांध येथील लॉगहट विश्रामगृह येथे गोंदिया-भंडारा जिल्ह्यातील भटक्या समाजातील नागरिकांच्या समस्यांच्या आढावा बैठकीत श्री.बडोले बोलत होते. यावेळी जिल्हाधिकारी डॉ.विजय सूर्यवंशी, भंडारा जिल्हाधिकारी डॉ.अभिजीत चौधरी, जि.प.उपाध्यक्ष श्रीमती रचना गहाणे प्रामुख्याने उपस्थित होत्या.
श्री.बडोले पुढे म्हणाले, भटक्या समाजाला कुठेतरी स्थायी केले पाहिजे. त्यांना रोजगाराच्या संधी उपलब्ध करुन दिल्या पाहिजे. या समाजातील महिलांना वसंतराव नाईक महामंडळामार्फत गृह उद्योग उभारण्यासाठी सहकार्य करावे. त्या माध्यमातून त्यांना रोजगार उपलब्ध होण्यास मदत होईल. त्यांच्या मुलांच्या शिक्षणाचे प्रश्न देखील मार्गी लावले पाहिजे.
पोलीस पाटील, तलाठी, ग्रामसेवक, सरपंच व कोतवाल यांचा स्थानिक चौकशी अहवाल प्राप्त करुन त्यांच्या जात प्रमाणपत्राचा प्रश्न सोडविण्यात यावा असे सांगून पालकमंत्री बडोले पुढे म्हणाले, हा भटका समाज घरे नसल्यामुळे कापडी पालाचे घरे तयार करुन राहतो. त्यांच्या पालावरच्या शाळाअंतर्गत पालावर जावून विद्यार्थ्यांना दोन तास शिकविण्यात यावे. यासाठी नाविण्यपूर्ण योजनेतून निधी उपलब्ध करुन देण्यात येईल. तसेच त्यांना रमाई घरकुल योजनेअंतर्गत सौर कंदील दिले पाहिजे. पंतप्रधान आवास योजनेअंतर्गत त्यांना घरकुल योजनेचा लाभ देण्यात यावा. तसेच त्यांच्या वन जमिनीच्या पट्टयांबाबतचा प्रश्न मार्गी लावण्यात यावा असेही त्यांनी यावेळी उपस्थित अधिकाऱ्यांना निर्देश दिले.
जिल्हाधिकारी डॉ.सूर्यवंशी म्हणाले, शासनाच्या अनेक लोककल्याणकारी योजना आहेत. या समाजाच्या प्रश्नांचे गांभीर्य लक्षात घेवून त्यांच्या समस्या लवकरच सोडविण्यात येतील असेही ते म्हणाले.
भंडारा जिल्हाधिकारी डॉ.चौधरी म्हणाले, या समाजाच्या समस्या सोडविण्यासाठी लवकरच कृती आराखडा तयार करुन त्यांचे प्रश्न मार्गी लावण्यात येतील असे त्यांनी सांगितले.
या बैठकीला गोंदिया जिल्ह्यातील उपविभागीय अधिकारी सर्वश्री सुनिल सूर्यवंशी (तिरोडा), सिध्दार्थ भंडारे (अर्जुनी/मोर), के.डी.मेश्राम (गोंदिया), मोहन टोनगावकर (देवरी), गोंदिया तहसिलदार सर्वश्री अरविंद हिंगे, रविंद्र चव्हाण, साहेबराव राठोड, कल्याणकुमार डहाट, प्रशांत सांगडे, विठ्ठल परळीकर, संजय नागटिळक, भंडारा जिल्ह्यातील उपविभागीय अधिकारी सर्वश्री डॉ.संपत खिल्लारी, शिल्पा सोनाळे, दिलीप तलमले, तहसिलदार सर्वश्री संजय पवार, राजीव शक्करवार यांचेसह अन्य तहसिलदार उपस्थित होते. यावेळी गोंदिया समाज कल्याणचे सहायक आयुक्त मंगेश वानखेडे, भंडारा समाज कल्याणचे सहायक आयुक्त देवसूदन धारगावे, वसंतराव नाईक महामंडळाचे अधिकारी, भटक्या जमाती संघटनेचे अध्यक्ष श्री.चव्हाण उपस्थित होते. सभेचे प्रास्ताविक दिलीप चित्रीवेकर यांनी केले तर उपस्थितांचे आभार शिवा कांबळे यांनी मानले.