गोंदिया,दि.26-राज्यात नुकत्याच पार पडलेल्या ग्रामपंचायतीच्या काही निवडणुकासोबतच गोंदिया जिल्ह्यातील अर्जुनी मोरगाव तालुक्यातील सिरेगावबांध ग्रामपंचायतीची निवडणुक सुध्दा पार पडली.विशेष म्हणजे सिरेगाव बांध हे गाव गोंदिया जिल्हा परिषदेच्या उपाध्यक्ष व भाजपच्या वरिष्ठ पदाधिकारी श्रीमती रचनाताई गहाणे यांचे गाव.परंतु श्रीमती गहाणे यांना आपल्याच गावात ग्रामपंचायतीवर भाजपची सत्ता स्थापन करता आली नसल्याने अर्जुनी मोरगाव तालुक्यात चर्चेचा विषय झालेला आहे.सिरेगावबांध ग्रामपंचायतीच्या 9 सदस्यासाठी झालेल्या निवडणुकीत राष्ट्रवादी काँग्रेसने 5 जागा जिंकत ग्रामपंचायतीवर कब्जा मिळविला.तर भारतीय जनता पक्षाला बहुमत मिळावे यासाठी दिवसभर गहाणेताई या तळ ठोकून होत्या.परंतु मतदारांनी त्यांच्या कार्याला सहकार्य करण्याएैवजी राष्ट्रवादीला मदत केल्याचे दिसून आले.राष्ट्रवादी काँग्रेसची पॅनल ही लोकपाल गहाणे यांच्या नेतृत्वात लढविण्यात आली.विशेष म्हणजे लोकपाल गहाणे हे रचनाताईंचे सख्खे दीर असल्याची माहिती सुत्रांनी दिली आहे.
