अंगूल- मोबाईलवर बोलणा-या बसचालकाचे सायकलस्वाराला वाचवण्याच्या नादात बसवरील नियंत्रण सुटल्याने बस पुलावरुन खाली कोसळल्याची दुर्दैवी घटना ओडिशात घडली. या अपघातात २१ जणांचा मृत्यू झाला असून सुमारे ३० जण जखमी झाले आहेत. यातील १५ जणांची प्रकृती गंभीर असल्याचे सांगितले जाते.
ओडिशामधील महाराजा ट्रॅव्हल्सची खासगी बस अंगूल जिल्ह्यातील अथामलिककडून बाँधकडे जाण्यासाठी निघाली होती. जुन्या मानिंत्री पुलाजवळ बस आली असता बसचालकाचे गाडीवरील नियंत्रण सुटले आणि बस पुलाचा कठडा तोडून ५० फुट खाली कोसळली. यात १४ जणांचा घटनास्थळीच मृत्यू झाला. तर ७ जणांचा रुग्णालयात उपचारादरम्यान मृत्यू झाला. उर्वरित जखमींना अंगूल आणि कटकमधील रुग्णालयात दाखल करण्यात आले आहे. बाँधपासून ४० किलोमीटर अंतरावर हा भीषण अपघात झाला.
