व्यसनमुक्ती सेवा पुरस्कार १७ सप्टेबरपर्यंत प्रस्ताव

गोंदिया,दि.१२ : व्यसनमुक्ती क्षेत्रात मौलिक कार्य करणाऱ्या कार्यकर्त्यांचा, संस्थांचा गौरव करण्यासाठी तसेच व्यसनमुक्ती क्षेत्रात कार्य करीत असलेल्या कार्यकर्ते व संस्थांच्या कार्याला दाद देण्यासाठी व इतर कार्यकर्त्यांना त्यापासून प्रेरणा मिळावी ज्यामुळे व्यसनमुक्ती कार्याच्या उत्थानासाठी कार्यकर्त सरसावून पुढे येतील व व्यसनमुक्ती प्रचार कार्याचा दर्जा वाढवितांना सर्वसमावेशकता निर्माण करण्यासाठी त्यांच्या कार्याची दखल घेवून राष्ट्रपिता महात्मा गांधी राज्यस्तरीय व्यसनमुक्ती सेवा पुरस्कार देवून गौरविण्यात येणार आहे.
व्यसनमुक्ती क्षेत्रात कार्य करणाऱ्या व्यक्तीला १५ हजार रुपये व संस्थेला ३० हजार रुपये तसेच सन्मानपत्र, स्मृतिचिन्ह, शाल, श्रीफळ पुरस्काराने गौरविण्यात येईल. व्यसनमुक्ती कार्यकर्त्यासाठी लेखक, कवी, पत्रकार/संपादक व साहित्यिक यांना प्रत्येकी एक असे पाच पुरस्कार, सामाजिक कार्यकर्त्यांना दहा पुरस्कार, किर्तनकार, प्रवचनकार चार पुरस्कार, पारंपारीक लोककला उदा.शाहीर, गोंधळी, भारुडकार, पोतराज, वासुदेव, लोकनाट्यकार यांना प्रत्येकी एक असे सहा पुरस्कार, शासकीय अधिकारी/कर्मचारी, निमशासकीय अधिकारी/कर्मचारी असे तीन पुरस्कार. सामाजिक सेवाभावी संस्थांसाठी उदा. सेवाभावी संस्था तीन पुरस्कार, युवक मंडळे, महिला मंडळे, भजनी मंडळे, बचतगट व क्रीडा मंडळे यांना तीन पुरस्कार, शाळा व महाविद्यालयासाठी प्रत्येकी एक असे तीन पुरस्कार. मिडिया उदा.वृत्तपत्रांना (हिंदी,इंग्रजी व मराठी) प्रत्येकी एक असे तीन पुरस्कार, इलेक्ट्रॉनिक मिडिया यांना दोन पुरस्कार. उद्योग कारखाने यांना तीन, उद्योग व्यवस्थापन यांना तीन व मजूर संघटना यांना तीन पुरस्कार. असे विविध गटातून एकूण ५१ पुरस्कारासाठी व्यसनमुक्ती क्षेत्रात भरीव व मौलिक कार्य करणाऱ्या व्यक्ती व संस्थांकडून शिफारसी व कागदपत्रासह प्रस्ताव मागविण्यात येत आहे.
व्यसनमुक्ती क्षेत्रात मौलिक/भरीव कार्य करणारी व्यक्ती/संस्था असावी. व्यसनमुक्ती सेवा पुरस्कारासाठी वयाची अट नाही. या क्षेत्रात कार्य करणारी व्यक्ती/संस्था राज्यात कार्यरत असावी. या पुरस्कारासाठी व्यक्ती/राज्य/जिल्हा/तालुका पातळीवर किमान १५ वर्ष व्यसनमुक्ती क्षेत्रात कार्य केलेले असावे. . या पुरस्कारासाठी एकापेक्षा अधिक वेळा पात्र समजण्यात येणार नाही. व्यसनमुक्ती क्षेत्रात कार्य करणारे खासदार, आमदार, नगरसेवक, जि.प.सदस्य किंवा इतर कोणतेही लोकप्रतिनिधी या पुरस्कारासाठी पात्र राहतील. संस्था नोंदणी प्रमाणपत्र जोडणे आवश्यक आहे. संस्था किमान १५ वर्ष जुनी असावी. संस्थेने किमान १० वर्ष व्यसनमुक्ती क्षेत्रात अधिक कार्य केलेले असावे. संस्थेने मागील पाच वर्षात लेखा अहवाल/वार्षिक अहवाल जोडणे आवश्यक आहे. या पुरस्कारासाठी विविध अर्जाचे नमूने जिल्हा समाज कल्याण अधिकारी जि.प.गोंदिया या कार्यालयात १७ सप्टेबरपर्यंत सादर करावे. असे आवाहन प्रभारी जिल्हा समाज कल्याण अधिकारी मिलिंद रामटेके यांनी केले आहे.