नवेगाव-नागझिरा व्याघ्र प्रकल्पाचे बफर घोषित

गोंदिया दि..२५ : मागील तीन वर्षांपूर्वी व्याघ्र प्रकल्पाचा दर्जा प्रदान करण्यात आलेल्या नवेगाव-नागझिरा व्याघ्र प्रकल्पासाठी आता १२४१ चौ. किलो मीटरच्या बफर क्षेत्राची घोषणा करण्यात आली आहे. यासंबंधी राज्य शासनाने अलीकडेच अधिसूचना जारी केली आहे. त्यानुसार या १२४१ चौ. किलोमीटरच्या बफरमध्ये ६४८.६८ चौ. किलोमीटरचे वनक्षेत्र आणि ५९२.५९ चौ. किलोमीटरमधील झुडपी जंगलाचा समावेश करण्यात आला आहे. वन विभागाने काही वर्षांपूर्वी नागझिरा अभयारण्य आणि नवेगाव राष्ट्रीय उद्यान यांना एकत्रित करून नव्या व्याघ्र प्रकल्पाचा प्रस्ताव तयार केला होता. त्यानुसार राज्य शासनाने १२ डिसेंबर २0१३ रोजी वन्यजीव अधिनियम १९७२ नुसार एक अध्यादेश जारी करून या नवेगाव-नागझिरा व्याघ्र प्रकल्पाची घोषणा केली होती. त्यानुसार भंडारा व गोंदिया येथील प्रादेशिक वन विभागासह एफडीसीएमच्या अधिकार क्षेत्रातील संरक्षित जंगल आणि झुडपी जंगलाचा या बफर क्षेत्रात समावेश करण्यात आला.