अकोला, दि. 23 – जिल्हा प्रशासन प्रशिक्षण संस्था(डीएड)ची प्रशस्त इमारत ब्रिटिशांनी बांधली असून, या इमारतीला अंदाजे दीडशे वर्ष पूर्ण झाले असून, इमारत ठिकठिकाणी जीर्ण झाली आहे. भिंतींना, छताला तडे गेलेले आहेत. इमारतीचा अर्ध्या भागाची पडझड झाली असून, अर्धी इमारत शाबूत आहे. या शाबूत इमारतीमध्ये डीटीएडचे विद्यार्थी शिक्षण घेतात. जीर्ण आणि पडझड झालेल्या इमारतीमुळे विद्यार्थ्यांसोबतच येथील शिक्षकांचे जीवन धोक्यात आले आहे. नवीन इमारत बांधण्यासंबधीचा प्रस्ताव शासनाकडे पाठविण्यात आला आहे. इमारत शिकस्त आणि जीण झाली असल्याचे पत्र प्रशासनाला वर्षभरापूर्वीच ब्रिटिशांनी इंग्लंडहून पाठविले. परंतु त्या पत्राची अद्यापपर्यंत प्रशासनाने दखल घेतल्याचे दिसून येत नाही. 

देवरी ,दि.23: एकात्मिक आदिवासी विकास प्रकल्प अंतर्गत येणार्‍या सडक-अर्जुनी तालुक्यातील कोकणा येथील श्रीकृष्ण अवधूत आदिवासी अनुदानीत आश्रमशाळेतील ४ थ्या वर्गात शिकत असलेली करिना सुकलाल उईके हिचा रविवारी (दि.१८) सकाळी ११ वाजता मृत्यू झाला. तिचा मृत्यू आश्रमशाळेतील कर्मचार्‍यांच्या दुर्लक्षामुळे झाल्याचा आरोप मृत् विद्यार्थिनीचे वडील सुकलाल उईके यांनी केला असून या संबंधात प्रकल्प अधिकारी जितेंद्र चौधरी यांना सोमवारी (दि.१९) निवेदन देऊन योग्य चौकशीची मागणी केली आहे. तर या प्रकरणी संबंधीत आश्रमशाळेच्या व्यवस्थापक मंडळाची चौकशी करून त्वरीत कारवाई करण्याची मागणी जिल्हा काँग्रेसचे महासचिव सहषराम कोरोटी यांनी केली आहे.

सतिश कोसरकर

नवेगावबांध,दि.23: नवेगावबांध व्याघ्र प्रकल्पाच्या राखीव जंगलात बोदराईनजीक  मंगळवारच्या १0 इसमांना नवेगावबांध वनविभागाच्या गस्ती पथकाने खोदकाम करतांना रंगेहाथ पकडले. या आरोपींनी अनधिकृत राखीव जंगलात प्रवेश करुन गुप्तधन शोधण्याच्या नावावर खोदकाम करण्याचा प्रयत्न केल्याचे समोर आले असले तरी वन्य प्राण्यांची शिकार करण्याचा त्यांचा प्रयत्न होता, की गुप्तधनाचा शोध याचा तपास सुरू आहे.याप्रकरणी वनविभागाने त्या १0 आरोपींना अटक केली. गुरुवारी यापैकी ६ आरोपींची जमानतीवर सुटका झाली तर ४ आरोपींची भंडारा कारागृहात न्यायालयीन कोठडीत रवानगी करण्यात आली आहे.
यामध्ये देवदास भिक्षू जनबंधू रा.रामपुरी, निकेश रामचंद्र गजबे रा.भुरसीटोला, करण शालीकराम गजबे रा.पिंडकेपार साकोली, विनोद मनोहर सावसाकडे रा.तर्िी (अड्याळ), किसनराव प्रभाकर टेंभरे रा.हौशंगाबाद (मध्यप्रदेश), मनोजकुमार भीमराव घोरमारे रा.मालेगाव भंडारा, कुंदन मेश्राम, शालीकराम गजबे, ज्ञानेश्‍वर विश्‍वनाथ वैद्य व उमेश गजबे सर्व रा.बिडटोला यांचा समावेश होता. गस्तीपथक तिथे जाऊन धडकले.घनदाट जंगलात हे लोक खड्डा खोदण्याचे काम करीत होते.वनकर्मचार्‍यांना बघून पाच आरोपी पळाले तर पाच आरोपी घटनास्थळावर सापडले. या पाच आरोपींना मंगळवारी अटक करुन बुधवारला स्थानिक न्यायालयात हजर करण्यात आले. त्यांना दोन दिवसांची वनकोठडी मंजूर केली होती. बुधवारला पसार झालेल्या पाच आरोपींना अटक करुन गुरुवारला (दि.२२) पुन्हा न्यायालयात हजर करण्यात आले. या सर्व आरोपींवर शस्त्रांसह वनकायद्याच्या विविध कलमान्वये गुन्हे नोंदविण्यात आले. आरोपीतर्फे अँड.मोहन भाजीपाले तर वन विभागातर्फे अँड.राजेश पालीवाल यांनी युक्तीवाद केला.