मुंबई- राज्यातील भाजप सरकारने विधानसभेत जिंकलेल्या विश्वासदर्शक ठरावाला आव्हान देणा-या दोन याचिकांवर २८ नोव्हेंबर रोजी सुनावणी होणार आहे. केतन तिरोडकर आणि राजकुमार अवस्ती या दोघांनी देवेंद्र फडणवीस यांच्या सरकारविरोधात जनहित याचिका दाखल केल्या आहेत.
या याचिकेवर मुख्य न्यायमूर्ती मोहित शहा यांच्या अध्यक्षतेखालील खंडपीठासमोर सुनावणी होणार आहे.
विधानसभेचे अध्यक्ष हरिभाऊ बागडे आणि मुख्यमंत्री फडणवीस यांनी सभागृहात बहूमत नसताना देखील विश्वासदर्शक ठराव मंजूर करून घेतला.
विधानसभेत २८८ सदस्य आहेत. तर भाजपकडे केवळ १२३ आमदार आहेत. बहूमतासाठी १४५ आमदारांचा पाठिंबा आवश्यक असताना भाजपने बहूमत कसे काय सिद्ध केले. तसेच बहूमत सिद्ध करण्यासाठी आवाजी मतदानाचा वापर करण्यात आला. सभागृहातील १२३ सदस्यांनी मोठ्याने ओरडून १४५ सदस्य सरकारच्या बाजूने असल्याचे दाखवल्याचे तिरोडकर यांनी याचिकेत म्हटले आहे.
इतक नव्हे तर तिरोडकर यांनी फसवणूक आणि कट केल्याप्रकरणी विधानसभा अध्यक्ष आणि मुख्यमंत्र्यांच्या विरोधात सीबीआयने गुन्हा दाखल करावा अशी मागणी केली आहे.

मुंबई-मनसे अध्यक्ष राज ठाकरे यांनी सोमवारी दुपारी शिवसेनाप्रमुख दिवंगत बाळासाहेब ठाकरे यांना शिवाजी पार्कवरील स्मृतिस्थळाजवळ जाऊन श्रद्धांजली वाहिली. यावेळी त्यांच्यासोबत मनसेचे नेते बाळा नांदगावकर, नितीन सरदेसाई उपस्थित होते. बाळासाहेब ठाकरे यांच्या द्वितीय स्मृतिदिनानिमित्त सोमवारी सकाळपासून हजारो चाहते शिवाजी पार्कवरील स्मृतिस्थळावर जाऊन आपल्या लाडक्या नेत्याला श्रद्धांजली वाहत आहेत.
शिवसेना पक्षप्रमुख उद्धव ठाकरे यांच्यासह पक्षाचे नेते संजय राऊत, रामदास कदम, दिवाकर रावते आणि इतर नेते यावेळी स्मृतिस्थळाजवळ उपस्थित आहेत. राज ठाकरे यांनी पुष्प वाहून बाळासाहेब ठाकरे यांना श्रद्धांजली वाहिली. यानंतर त्यांनी तिथेच उपस्थित असलेल्या उद्धव ठाकरे यांची भेट घेतली व चर्चा केली.

गोंदिया-ग्रामपंचायतीच्या सदस्यांना ग्रामसभेचा उपस्थिती भत्ता २५ रूपये देय होता़ अत्यल्प भत्ता मिळत असल्यामुळे कित्येक ग्रामपंचायत सदस्य ग्रामसभेला उपस्थित राहण्यासाठी टाळाटाळ करीत होते. ग्रामसभेच्या बळकटीकरणासाठी राज्य शासनाने विकासात्मक धोरणातून भत्ता वाढ करण्याचे ठरविले होते. आता राज्य शासनाने ग्रामपंचायत सदस्यांच्या उपस्थितीत भत्त्यात सरसकट आठपट वाढ केली आहे. ग्रामपंचायतीचे सरपंच व उपसरपंचाच्या मानधनात देखील शासनाने लोकसंख्येच्या आधारावर वाढ केली आहे़

सध्या शहरीकरण वाढत चालले आहे़ कित्येक गावांची लोकसंख्या देखील झपाट्याने वाढली आहे़ राज्यात एकूण २७९०६ ग्रामपंचायती आहेत़ मात्र वाढत्या शहरीकरणात देखील ५५ टक्के नागरिक अजूनही ग्रामीण भागात वास्तव्यास आहेत. ग्रामीण भागाच्या विकासासाठी पंंचायत राज व्यवस्थेतून प्रयत्न सुरू आहेत. पंचायतराज व्यवस्थेच्या योग्य मार्गदर्शकतत्त्वानुसार अनेक गाव स्वावलंबी झाली आहेत़ तरीही आदिवासी, अतिमागास क्षेत्रातील ग्रा. पं. सदस्य ग्रामविकासाच्या बाबतीत उदासीन आहेत़ कित्येक गावांत ग्रामसभा केवळ सोपस्कार झाले आहे़ यामुळे शासनाच्या विकासात्मक तत्वांना तडा जात आहे. ग्रामसभेतील उपस्थिती अत्यल्प असते. ग्रा. पं. चे सदस्य म्हणून निवडून आल्यावर देखील नाममात्र २५ रूपये उपस्थिती भत्ता मिळते, या सबबीमुळे सदस्य ग्रामसभेला अनुपस्थित राहतात. ग्रामविकासाकरिता सदस्यांना ग्रामसभेत उपस्थित राहिले पाहिजे यासाठी राज्य शासनाच्या ग्रामीण विकास विभागाने सदस्यांच्या भत्त्यात भरघोष वाढ केली आहे़ सदस्यांना २५ रूपये भत्त्यावरून आठपट वाढ झाल्याने सरसकट २०० रूपये उपस्थिती भत्ता देय राहणार आहे. वर्षभरात होणाऱ्या १२ ग्रामसभांना २०० रूपये प्रमाणे भत्ता ग्रामपंंचायत सदस्यांना मिळणार आहे़ भत्त्याप्रमाणेच सरपंच व उपसरपंच यांच्या मानधनात वाढ करण्याची मागणी कित्येक दिवसापासून होत होती़ मिळणारे मानधन हे त्या गावातील लोकसंख्येवर आधारीत राहणार आहे़ देय असलेल्या मानधनात शासन ७५ टक्के रक्कम देणार असून ग्रा. पं. ला २५ टक्के रक्कमेचा वाटा उचलावा लागणार आहे़

भंडारा – नवीन नागझिरा आणि कऱ्हांडला अभयारण्यातील वन्यप्राण्यांची संख्या वाढत असतानाच या अभयारण्यांच्या क्षेत्रातील शेतकऱ्यांच्या समस्या वाढल्या आहेत. 150 पेक्षा अधिक गावांत वन्यप्राण्यांचा शिरकाव होऊन संघर्ष होण्याची भीती आहे. मात्र, यातील 150 पेक्षा अधिक गावांचे पुनर्वसन अद्याप अधांतरीच आहे.

जिल्ह्यातील नवीन नागझिरा आणि उमरेड-कऱ्हांडला अभयारण्यात पवनी, मोहाडी, भंडारा, लाखनी व साकोली तालुक्‍यातील गावांचा समावेश झाला. आधीच निसर्गाच्या लहरीपणामुळे व्यथित झालेले येथील शेतकऱ्यांना आता वन्यप्राण्यांचाही सामना करावा लागत आहे. जिल्ह्यातील शेतकऱ्यांनी अधिक उत्पन्नासाठी साखर कारखाना सुरू झाल्यापासून उसपीक घेणे सुरू केले. त्यामुळे गावांच्या शिवारात रानडुकरे व तृणभक्षक प्राण्यांना आसराच मिळाला. त्यामुळे प्रत्येक गावातील शेतकऱ्यांना रानडुकरांमुळे पिकांचे नुकसान झाल्याच्या तक्रारी आहेत.

विद्युत भारनियमनामुळे रात्रीबेरात्री शेतात पिकाला पाणी देण्यास जाणाऱ्या शेतकऱ्यांना वन्यपशूंच्या हल्ल्यांची भीती निर्माण झाली आहे. नवीन अभयारण्यांमुळे 150 पेक्षा अधिक गावांचा जंगलात समावेश झाला. त्यामुळे या गावातील नागरिकांना वनोपजावर आधारित व्यवसाय बंद पडला. शिवाय, स्वत:च्या शेतातील पिकाची चिंता निर्माण झाली आहे. गेल्या आठवड्यात साकोली तालुक्‍यात बिबट्याने गावात येऊन वृद्ध महिलेचा बळी घेतला. तसेच पवनी तालुक्‍यात दोन गावकऱ्यांना जखमी केले. यामुळे ग्रामीण भागात भीतीचे वातावरण आहे.