माजी अर्थमंत्री व कॉंग्रेसचे प्रभावशाली नेते पी चिदंबरम यांचा मुलगा असलेल्या कर्ती चिदंबरम याच्या कंपन्यांवर सक्तवसुली संचलनालय (इडी) व प्राप्तिकर विभागाने धाडी टाकल्याचे वृत्त आज सूत्रांनी दिले. याआधी, आर्थिक गैरव्यवहाराच्या आरोपांतर्गत इडी चौकशी करत असलेल्या “एअरसेल-मॅक्सिस‘ प्रकरणासंदर्भात कर्ती यांच्याशी निगडित असल्याचे मानल्या जात असलेल्या ऍडव्हांटेज स्ट्रॅटेजिक कन्सल्टिंग या कंपनीच्या दोन संचालकांना गेल्या ऑगस्ट महिन्यात इडीतर्फे समन्स बजाविण्यात आले होते.
सध्याचे केंद्रीय अर्थमंत्री व तत्कालीन राज्यसभा विरोधी पक्ष नेते अरुण जेटली यांनी मे 2012 मध्ये राज्यसभेमध्ये बोलताना तत्कालीन केंद्रीय गृहमंत्री पी चिदंबरम यांच्या कुटूंबीयांपैकी एकाच्या मालकीच्या असलेल्या ऍडव्हांटेज स्ट्रॅटेजिक कन्सल्टिंग कंपनीकडून एअरसेल कंपनीस पैसे देण्यात आल्याचा आरोप केला होता. मॅक्सिस या मलेशियामधील मोठ्या कंपनीकडून एअरसेल कंपनीमध्ये मोठी गुंतवणूक करण्यात आल्याच्या काही दिवस आधीच हा व्यवहार झाल्याचा आरोप करण्यात आला होता. 2006 मध्ये चिदंबरम हे केंद्रीय अर्थमंत्री असताना एअरसेलमधील मॅक्सिस कंपनीच्या या गुंतवणुकीस मान्यता देण्यात आली होती.
धाड टाकण्यात आलेल्या कुठल्याही कंपनीमध्ये माझ्या कुटूंबीयांपैकी कोणत्याही सदस्याचे समभाग नसल्याचे आपण अनेकदा सांगितल्याचेही चिदंबरम यांनी यावेळी स्पष्ट केले.
