नागपूर दि,१– गेल्या 2015 मध्ये गुन्हेगारीच्या घटनांनी नागपूर चांगलेच हादरले. उपराजधानी असलेल्या नागपूरला विरोधकांनी ‘क्राईम कॅपिटल’ असे नावही दिले. तर, नवीन वर्षाच्या स्वागताचा जल्लोष सुरू असताना एका युवकाचा खून झाल्याने पुन्हा नागपुरात खळबळ उडाली आहे. धीरज कांबळे असे हत्या झालेल्या 24 वर्षीय युवकाने नाव आहे. त्याचा खून कोणी आणि का केला हे अद्याप स्पष्ट झाले नसल्याची माहिती सुत्रांनी दिली आहे.
नवीन वर्षाच्या पूर्वसंध्येला नागपुरमध्ये सर्वत्र पोलिसांचा तगडा बंदोबस्त होता. रात्री सुमारे 11 वाजेदरम्यान कोतवाली पोलिसांना एक तरूण जखमी अवस्थेत आढळला. हा तरूण सिरसपेठ येथे पडलेला आहे, अशी माहिती पोलिसांना फोनवरून देण्यात आली. पोलिसांनी तात्काळ घटनास्थळ गाठून युवकाला हॉस्पिटलमध्ये दाखल केले.
धीरज कांबळे याच्यावर हल्लेखोरांनी तीक्ष्ण हत्यारांनी वार केले होते. पोलिसांनी घटनास्थळावरून तात्काळ त्याला हॉस्पिटलमध्ये दाखल केले. मात्र तपासणी दरम्यान डॉक्टरांनी त्याला मृत घोषित केले. धीरजची हत्या कोणी आणि का केली याचा तपास पोलिस घेत आहेत.