बुलडाणा,दि. २३-अंधश्रद्धा निर्मूलनासाठी झटणाऱ्या पुरोगामी चळवळीतील नरेंद्र दाभोलकर, गोविंद पानसरे यांचे मारेकरी सापडणे अशक्य आहे. आपल्यासह आणखी दहा कार्यकर्त्यांची हत्यादेखील होऊ शकते, अशी खळबळजनक माहिती अंधश्रद्धा निर्मूलन समितीचे संस्थापक संघटक प्रा. श्याम मानव यांनी दिली. चळवळीत काम करणारा असल्या गोष्टींना घाबरत नसून कुठल्याही धर्माविरुद्ध नाही तर अनिष्ठ रुढीविरुध्द हा लढा आहे, असेही त्यांनी स्पष्ट केले.
जादूटोणाविरोधी कायदा पीआयएमसीतर्फे पोलिसांचे प्रशिक्षण शिबिर आयोजित करण्यात आले होते. त्यानिमित्त बुलडाणा आणि अकोला येथे प्रा. मानव यांनी पत्रकारांशी संवाद साधला. यावेळी पीआयएमसीचे समन्वयक प्रवीण गांगुर्डे, विदर्भ संघटक किशोर वाघ, अंनिस जिल्हाध्यक्ष शिवाजीराव पाटील, दत्ता सिरसाट, प्रमोद टाले, नाना मोरे यांची उपस्थिती होती. प्रा. मानव म्हणाले, दाभोलकर अन् पानसरेंचे मारेकरी शोधायला पोलिस तपासाच्या दृष्टीने मर्यादा आहेत. हत्या करणाऱ्यालाही आठवणार नाही, इतक्या सफाईदारपणे ही घटना घडवून आणण्यात आली आहे. खुन्याने केलेली चुकी व परिस्थितीजन्य पुरावाच उपलब्ध नसल्याने मारेकरी शोधणे अवघड असल्याचा पुनरुच्चारही त्यांनी केला. पोलिस यंत्रणेला यात दोष देऊन उपयोग नाही, असेही ते म्हणाले.
राज्यभरात जादूटोणाविरोधी कायद्याच्या प्रभावी अंमलबजावणीसाठी प्रचार व प्रसाराचे काम सुरू आहे. ३५ जिल्ह्यात आतापर्यंत जाहीर व्याख्यानांना उत्तम प्रतिसाद मिळाला. कायद्याची खरी अंमलबजावणी होण्यासाठी जनजागृतीसोबतच पोलिसांना प्रशिक्षणही आवश्यक आहे. यामध्ये नाशिक, कोकण विभागातील काम पूर्ण झाले आहे. पीआय दर्जाच्या अधिकाऱ्यांना आठ तासांचे प्रशिक्षण देण्यात येते. विदर्भातील पहिल्या टप्प्याची सुरुवात बुलडाण्यातून झाली आहे.
२५ यवतमाळ, २९ अमरावती, ७ जुलैला गोंदिया, त्यापाठोपाठ नागपूर, गडचिरोली व चंद्रपुरातदेखील पोलिस प्रशिक्षण शिबिर होणार आहेत. या प्रशिक्षणानंतर पाच हजार शाळा व महाविद्यालयांमध्ये वैज्ञानिक दृष्टीकोन विकास कार्यशाळा घेऊन जनजागृती करण्यात येणार असल्याचे प्रा. मानव म्हणाले.
