नागपूर – सभेत दुष्काळावर चर्चा सुरू असतानाच विरोधकांनी सभागृहात मुख्यमंत्री उपस्थित नसल्याच्या कारणावरून गोंधळ घातल्याने अध्यक्षांनी दहा मिनिटांसाठी सभागृह तहकूब केले. मात्र, या घटनेवर मुख्यमंत्री विरोधकांवर चांगलेच संतापले.

सभेत दुष्काळावर सुरू असतानाच विजय वडेट्टीवार यांनी सभागृहात मुख्यमंत्री, अर्थमंत्री, महसूलमंत्री नसल्याच्या कारणावरून थयथयाट केला. वडेट्टीवारांची री ओढत कॉंग्रेससह राष्ट्रवादीच्या सदस्यांनीही गोंधळ घालण्यास सुरुवात केली. गोंधळामुळे अध्यक्ष हरिभाऊ बागडे यांनी दहा मिनिटांसाठी सभागृह तहकूब केले. दहा मिनिटांनंतर सभागृहात मुख्यमंत्री देवेंद्र फडणवीस आले. दुष्काळावर पुन्हा चर्चा सुरू होण्यापूर्वी त्यांनी विरोधकांवर शरसंधान साधले. यापूर्वी याच सभागृहात सदस्य बोलत असताना एक राज्यमंत्री बसून राहत होते, असा टोला मुख्यमंत्र्यांनी विरोधकांना लावला. आता पाच-पाच मंत्री असताना सभागृह बंद पाडले. दुष्काळासारख्या गंभीर विषयावर चर्चा सुरू असताना त्यात अडथळा निर्माण केल्याने विरोधक शेतकऱ्यांबाबत गंभीर नसल्याचीच शंका त्यांनी उपस्थित केली. अडथळा निर्माण करू नका, तुम्ही सूचना करा, तुमच्या सूचना ऐकल्या जातील, या शब्दात त्यांनी विरोधकांना ठणकावले. त्यानंतर सायंकाळपर्यंत सभागृहात सर्वच सदस्यांनी शेतकऱ्यांसाठी उपाययोजना सुचविल्या. विरोधातील काही सदस्यांनी शेतकऱ्यांना अद्याप पॅकेज घोषित न केल्याबाबत सरकारला धारेवर धरत टीका केली. माजी मंत्री छगन भुजबळ यांनी शेतकऱ्यांचे वीजबिल व कर्ज माफ करण्याची मागणी केली. सभागृहाचे ज्येष्ठ सदस्य गणपतराव देशमुख, सपाचे अबू आझमी, अमित देशमुख, बाळासाहेब थोरात, राजेश टोपे, शशिकांत खेडकर, मधुकर चव्हाण, संभाजी पाटील निलंगेकर, शशिकांत शिंदे, धैर्यशील पाटील, जय रावत, बच्चू कडू, हर्षवर्धन जाधव, यशोमती ठाकूर, सतीश पाटील, विनायक जाधव, अर्जुन खोतकर, हरीश पिंपळे, त्र्यंबक पिसे, आशीष देशमुख यांनीही दुष्काळावरील चर्चेत शेतकऱ्यांना दिलासा देण्याची मागणी करीत काही उपाययोजनाही सुचविल्या.

नागपूर – कणकवलीचे काँग्रेसचे तरुण आमदार नितेश राणे यांनी आज विधानसभेत दुष्काळाच्या चर्चेत भाग घेताना पहिल्याच भाषणाने सभागृहाचे नुसते लक्ष वेधून घेतले नाही, तर अतिशय मोजक्या शब्दांतील भाषणामुळे सभागृहाने बाके वाजवून त्यांना मनापासून दाद दिली.

विधानसभेत नियम २९३ अन्वये सुरू असलेल्या चर्चेत भाग घेताना पहिल्याच भाषणात नितेश राणे यांनी त्यावेळच्या विरोधी पक्षाच्या बाकांवर बसलेल्या सुधीर मुनगंट्टीवार यांनी आमच्या सरकारला ‘कासवछाप’ सरकार म्हटले होते. त्यांचे मागच्या वर्षीचे भाषण माझ्या हातात आहे. त्यावेळी तुम्ही कासवछाप म्हणालात, आता तुमच्या सरकारला गती का नाही, शिवाय तुमच्याबरोबर वाघ आल्यानंतर त्या वाघाची शेळी झाली आहे, असा सणसणीत टोला नितेश राणे यांनी लगावला.

ते आपल्या भाषणात म्हणाले की, ‘महाराष्ट्रावर दुष्काळाचे प्रचंड सावट आहे. अशा परिस्थितीत सर्वानी शेतक-यांच्या पाठीशी उभे राहण्याची गरज आहे. आता जे सत्ताधारी बाकांवर आहेत त्यांची पूर्वीची भाषणे मी वाचली. गेल्या वर्षी याच सभागृहात बोलताना सध्याचे वित्तमंत्री सुधीर मुनगंटीवार म्हणाले होते, ‘आघाडी सरकारची गती कासवासारखी आहे. हे सरकार कासवछाप आहे.’ आज भाजपाचे सरकार येऊन दोन महिने झाले. रोज आत्महत्या होत आहेत. तरी सरकारच्या मदतीचा वेग वाढत नाही. आता त्यांच्यासोबत स्वत:ला वाघ म्हणवून घेणारी शिवसेनाही त्यांच्यासोबत आहे, तरी सरकारची गती का वाढत नाही? सरकारची गती मंद झाली असताना शिवसेना थंड कशी? शिवसेनेच्या वाघाची शेळी झाली आहे काय, असा सवाल काँग्रेसचे तरुण तडफदार आमदार नितेश राणे यांनी सभागृहात केला. नितेश राणे यांनी पहिल्याच भाषणात सभागृहातील दोन्ही बाजूंच्या सदस्यांची मने जिंकली.

राज्यातील दुष्काळी परिस्थिती आणि शेतक-यांच्या आत्महत्या या विषयावर सभागृहात नियम २९३ अन्वये सुरू असलेल्या चर्चेत सहभागी होताना नितेश राणे यांनी सभागृहात आमदार म्हणून केलेल्या पहिल्याच भाषणात संपूर्ण सभागृहाचे लक्ष वेधून घेतले. त्यांच्या भाषणाची दखल विरोधी बाकांवर तर घेतली गेलीच पण सत्ताधारी बाकांवरून त्यांच्या भाषणाची दखल घेतली गेली. चर्चेला सुरुवात करताना नितेश राणे म्हणाले की, मी पहिल्यांदाच या सभागृहात बोलणार आहे. ही संधी मला पक्षाच्या अध्यक्षा सोनिया गांधी, उपाध्यक्ष राहुल गांधी आणि माझे नेते नारायण राणे यांच्या आशीर्वादाने मिळालेली आहे.
महाराष्ट्रातील दुष्काळावर चर्चा होणार आहे, असे कळल्यानंतर मी या पूर्वीच्या काही नेत्यांची सभागृहात मांडलेली मते जाणून घेण्यासाठी वाचनालयात जाऊन बसलो. गेल्या वर्षी हिवाळी अधिवेशनात आताचे मुख्यमंत्री देवेंद्र फडणवीस, महसूल मंत्री एकनाथ खडसे, अर्थमंत्री सुधीर मुनगंटीवार यांची भाषणे वाचली. ती आता माझ्या हातात आहेत. परंतु वेळ कमी असल्याने ते मी इथे वाचून दाखवणार नाही.
पण सुधीर मुनगंटीवार यांच्या भाषणाचा मी थोडासा उल्लेख करतो. ते तेव्हा म्हणाले होते, ‘‘राज्यात दुष्काळ पडलेला असताना सरकार कासव गतीने उपाय योजना करीत आहे. हे सरकार कासवछाप आहे.’’ मुनगंटीवार यांनी त्यावेळच्या सरकारला गती कमी असल्याने कासवाची उपमा दिली होती. मग आज शपथविधी झाल्यापासून हे सरकार काय करीत आहे. त्यांची गती इतकी का कमी आहे. आता त्यांच्यासोबत स्वत:ला वाघ म्हणून घेणारी शिवसेना आहे. सरकारच्या कारभाराची गती मंद झालेली असताना शिवसेना स्वस्थ कशी? वाघ म्हणवून घेणा-या शिवसेनेची शेळी झाली आहे काय? असा सवाल नितेश राणे यांनी करताच शिवसेनेच्या बाकावर चुळबूळ सुरू झाली. तेव्हा नितेश राणे म्हणाले मी वेगाबद्दल बोलतोय. तेव्हा सभागृहात हशा पिकला.

गिरीश बापट यांच्याकडून नितेश राणे यांचे अभिनंदन

अन्न-नागरी पुरवठा आणि संसदीय कामकाज मंत्री श्री. गिरीश बापट यांनी आमदार नितेश राणे यांच्या विधानसभेतील पहिल्याच भाषणाबद्दल त्यांचे मन:पूर्वक अभिनंदन केले आहे. विधान सभेचे उपसचिव विलास आठवले यांनीही नितेश राणे यांचे एका पत्राद्वारे खास अभिनंदन केले.

नागपूर-महसूलमंत्री एकनाथ खडसे आक्रमक आणि वादग्रस्त वक्तव्ये करीत असल्याने मुख्यमंत्री देवेंद्र फडणवीस नाराज असल्याची चर्चा असतानाच विधान परिषदेच्या सभागृह नेतेपदी खडसे यांची नियुक्ती केली जाणार आहे. त्यांच्याऐवजी सहकारमंत्री चंद्रकांत पाटील यांची नियुक्ती करण्यास खडसे यांनी आक्षेप घेतल्याने वाद टाळण्यासाठी केंद्रीय पक्षनेतृत्वाच्या सूचनेनुसार खडसे यांची नियुक्ती होणार आहे.
विधानसभेचे सभागृह नेते मुख्यमंत्री असतात, तर विधान परिषदेचे सभागृह नेते उपमुख्यमंत्री असावेत, अशी प्रथा काँग्रेस-राष्ट्रवादी काँग्रेस सरकारने पाळली. सध्या सरकारमध्ये खडसे यांना मुख्यमंत्र्यांनंतर दुसऱ्या क्रमांकाचा सन्मान देण्यात आला आहेत. पण गेल्या काही दिवसांत खडसे यांनी वादग्रस्त विधाने केल्याने सरकारची पंचाईत झाली. त्यामुळे त्यांची विधान परिषदेत सभागृह नेते म्हणून निवड न करण्याचे प्रयत्न सुरू होते. त्यांच्याऐवजी चंद्रकांत पाटील यांना नियुक्त करण्याचा विचार सुरू होता. पण खडसे यांचे अध्यक्ष अमित शहा यांच्याशी बोलणे झाले. त्यांच्याबाबत असलेल्या आक्षेपांचे स्पष्टीकरण केल्यावर खडसे यांच्या नावाला केंद्रीय नेतृत्वाने हिरवा कंदील दाखविल्याचे समजते. विधान परिषदेचे विरोधी पक्षनेतेपद धनंजय मुंडे यांच्याकडे आहे. या सभागृहात सत्तारूढ पक्ष कमजोर असून विरोधकांना तोंड देण्यासाठी खडसे यांच्यासारखा आक्रमक मंत्रीच असला पाहिजे, या हेतूने व त्यांच्या ज्येष्ठतेचा सन्मान ठेवण्यासाठी खडसे यांच्याकडे ही जबाबदारी सोपविल्याचे सूत्रांनी सांगितले